“Dağlıq Qarabağ problemi Kosovo məsələsindən köklü surətdə fərqlənir”. Bunu Con Hopkins Universitetinin Asiya-Qafqaz İnstitutunun direktoru, isveç mənşəli ekspert, professor Svante Kornell bildirib. Professor Kornell deyib: “Belə fərqlərdən biri insan hüquqlarının pozulması və əhalinin etnik tərkibinin dəyişdirilməsi faktlarının sayıdır. Kosovo münaqişəsində Serbiyanın kosovalılara qarşı etnik təmizləmə siyasəti aparması həmin ərazidə NATO-nun mandatı ilə beynəlxalq qüvvələrin yerləşdirilməsinə səbəb olub. Beynəlxalq müdaxilə müharibədən əvvəlki demoqrafik statusu bərpa etmişdir. Dağlıq Qarabağ münaqişəsində isə vəziyyət başqa cürdür. 1992-93-cü illərdə Qarabağda separatçılar etnik təmizləmələr aparmışlar. Bu, onların vəziyyətini Kosovodakından köklü surətdə fərqləndirir və separatçıların müstəqillik iddialarını zəiflədir. Demoqrafik vəziyyəti dəyişdirmək və sonra müstəqillik barədə siyasi bəyannamələr yaymaq yolverilməzdir. Bu, beynəlxalq hüququn fundamental prinsipidir”.