“Ötən sessiyada NATO Parlament Assambleyasının sədri Con Tannerlə görüşərkən belə bir tələb ortaya qoydum ki, nəyə görə bu hərbi-siyasi təşkilat Dağlıq Qarabağ məsələsinə münasibət bildirmir. Con Tanner də bizim tələbimizi anlayışla qarşıladı və söz verdi ki, payızda bu məsələyə baxılacaq. Dağlıq Qarabağ münaqişəsinə Avropa Şurası, Avropa İttifaqı, BMT Təhlükəsizlik Şurası münasibət bildirib. Nədən NATO Parlament Assambleyası öz reaksiyasını bildirməsin?” Bu sözləri APA-ya eksklüziv açıqlamasında Azərbaycan Milli Məclis sədrinin birinci müavini, NATO Parlament Assambleyasındakı (PA) nümayəndə heyətinin rəhbəri Ziyafət Əsgərov deyib.

O bildirib ki, 1992-ci ildən indiyə kimi Dağlıq Qarabağla bağlı beynəlxalq təşkilatlar tərəfindən qəbul olunan bütün qərar və qətnamələri NATO PA-nın prezidenti Con Tannerə təqdim edib.

Z. Əsgərov Ermənistan tərəfinin məsələ ilə bağlı narahatlığının başadüşülən olduğunu söyləyib: “Ermənistan tərəfinin narahatlığı həmişə olacaq və olmalıdır da. Çünki onlar özləri də anlayırlar ki, başqa bir ölkənin torpaqlarını zəbt ediblər, işğalçı siyasət yürüdürlər. Onlar beynəlxalq təşkilatların bu barədə qərar qəbul etməsini istəmirlər” . 

 Z. Əsgərov Ermənistanın getdikcə beynəlxalq aləmdən təcrid olunmağa başladığını vurğulayıb: “Ermənistan getdikcə divara sıxılır. Maraqlıdır ki, bu divar qurtarandan sonra onlar hara gedəcəklər?”  Qeyd edək ki, Ermənistan parlamentinin sədri Ovik Abramyan NATO PA-nın prezidenti Con Tannerə məktub göndərərək təşkilat tərəfindən Dağlıq Qarabağ münaqişəsinə dair hazırlanan hesabata narahatlığını bildirib.

Xatırladaq ki, NATO Parlament Assambleyasının payız sessiyası noyabrda Varşavada keçiriləcək.