ATƏT-in Minsk Qrupunun həmsədrləri Bernar Fasie (Fransa), Robert Bradtke (ABŞ), İqor Popov (Rusiya) və ATƏT-in fəaliyyətdə olan sədrinin şəxsi nümayəndəsi Anjey Kaspşik gələn həftə regiona səfər edəcəklər.

Bunu APA-ya eksklüziv açıqlamasında ATƏT-in fəaliyyətdə olan sədrinin şəxsi nümayəndəsi Anjey Kaspşik Tərtərin Çaylı kəndi istiqamətində avqustun 31-də baş vermiş silahlı insidentə münasibət bildirərkən deyib.

“Ermənistan rəhbərliyi Azərbaycanın ərazi bütövlüyünün beynəlxalq aləm tərəfindən qeyd-şərtsiz tanındığını çox gözəl anlayır. BMT Təhlükəsizlik Şurasının qətnamələrində, BMT Baş Assambleyasının, AŞ PA-nın və digər beynəlxalq təşkilatların sənədlərində bu məsələ birmənalı olaraq əksini tapıb”. Bu sözləri APA-ya açıqlamasında Azərbaycan Xarici İşlər Nazirliyinin mətbuat katibi Elxan Poluxov deyib.

Türkiyənin xarici işlər naziri Əhməd Davudoğlu sentyabrın 1-də ölkəsinin şərq vilayətlərinə səfər edib və Azərbaycan sərhədini keçərək qısa müddət Naxçıvan Muxtar Respublikasında olub. APA-nın “Zaman” qəzetinə istinadən verdiyi məlumata görə, Ə. Davudoğlu Türkiyə-Ermənistan sərhədindəki Arpaçayda əllərini yuyub. Nazir jurnalistlərə açıqlamasında deyib ki, Ermənistan-Azərbaycan ixtilafının həlli ilə Qafqazda sülh və sabitlik yaranacaq.

Ermənistan parlamentinin “İrs” fraksiyası spiker Ovik Abramyana “Dağlıq Qarabağ Respublikası”nın tanınması barədə qanun layihəsinə növbədənkənar baxılması ilə bağlı müraciət edib.